تطبيق جوال أو موقع ويب: وش يبدأ فيه مشروعك؟
«أبي تطبيق» من أكثر الطلبات اللي تجيني، وأحيانًا يكون الموقع هو الخيار الأذكى كبداية. وأحيانًا العكس. السؤال مو أيهم أفضل، السؤال وش يخدم عميلك.
الجواب المختصر
إذا عميلك بيستخدم خدمتك مرات متكررة، والتطبيق بيقدم له شي الموقع ما يقدر عليه، ابدأ بالتطبيق أو خطط له. وإذا عميلك يجيك من جوجل مرة أو مرتين، ابدأ بموقع سريع على الجوال.
متى يكون الموقع أفضل بداية؟
- عملاؤك يوصلون لك عن طريق البحث، لأن جوجل يعرض المواقع مباشرة.
- الزيارة قليلة التكرار، مثل طلب عرض سعر أو حجز خدمة سنوية.
- تبي تطلق بسرعة وتختبر الفكرة قبل ما تستثمر أكثر.
- ما تبي عميلك يحمّل شي عشان يشوف أسعارك.
التعديلات في الموقع توصل للكل فورًا، بدون مراجعة من المتاجر وبدون تحديث.
متى يستاهل التطبيق؟
- استخدام متكرر: طلبات قهوة، توصيل، حجوزات أسبوعية، برامج ولاء.
- تحتاج إشعارات فورية تذكّر العميل بتطبيقك.
- تعتمد على مزايا الجهاز: الموقع الدقيق، الكاميرا، البلوتوث، العمل بدون إنترنت.
- تجربة الدفع السريع بـ Apple Pay مهمة في رحلة الشراء المتكررة.
أيقونة على شاشة العميل الرئيسية قيمة حقيقية، بس بشرط إنه يحتاج يفتحها.
التكاليف اللي ما ينتبه لها الناس
بناء التطبيق بداية التكلفة مو نهايتها:
- رسوم المتاجر: حساب مطور Apple بـ 99 دولار سنويًا، وحساب Google Play برسوم 25 دولار لمرة وحدة.
- عمولة المتجر: تنطبق غالبًا على المنتجات الرقمية والاشتراكات داخل التطبيق. أما بيع منتجات أو خدمات تُستهلك خارج التطبيق، مثل القهوة والتوصيل، فعادةً يمر عبر بوابة دفع عادية. وراجع السياسات الحالية قبل ما تبني نموذج الربح.
- التحديثات: أنظمة iOS وأندرويد تتغير كل سنة، والتطبيق يحتاج صيانة عشان يبقى شغال.
- لوحة التحكم: أغلب التطبيقات تحتاج لوحة إدارة وخادم، وهذا جزء كبير من المشروع.
أهم نقطة: خلي الحسابات باسمك أنت، مثل ما شرحنا في 7 أسئلة تسألها أي مطور.
فيه حل وسط؟
نعم، وهو تطبيق الويب التقدمي (PWA): موقع ينضاف للشاشة الرئيسية ويشتغل مثل التطبيق، بدون متجر. يناسب الأدوات الداخلية وبعض الخدمات، لكنه أضعف من التطبيق الحقيقي في بعض مزايا الجهاز، خصوصًا على الآيفون.
وإذا قررت تطبيق، تقنيات مثل Flutter و React Native تبني نسخة آيفون وأندرويد من كود واحد، وهذا يوفر وقت وتكلفة لأغلب المشاريع.
خمسة أسئلة تحسم قرارك
- كم مرة بالشهر بيستخدم العميل خدمتك؟
- وين يلقاك عميلك أول مرة: جوجل، إنستقرام، أو توصية؟
- هل تحتاج ميزة ما يقدر عليها المتصفح؟
- هل عندك ميزانية للصيانة بعد الإطلاق، مو بس للبناء؟
- هل تقدر تقنع الناس يحمّلون التطبيق؟
لو أغلب إجاباتك تميل للتكرار والمزايا الخاصة، التطبيق يستاهل. غير كذا، ابدأ بموقع ممتاز، وطوّر لاحقًا. وتقدر تشوف العوامل اللي تحدد تكلفة الموقع قبل ما تقرر.
محتار بين الخيارين؟ ارسل لي فكرتك وأقول لك رأيي بصراحة.