قبل ما تدفع أول ريال: 7 أسئلة تسألها أي مطور
أغلب المشاكل بين صاحب المشروع والمطور ما تبدأ في الكود، تبدأ قبل ما ينكتب أول سطر: شي ما انقال بوضوح، وكل طرف فهمه بطريقته.
هذي سبعة أسئلة اسألها أي مطور أو شركة قبل ما تدفع، حتى لو كان اللي قدامك مو أنا.
1. وش بالضبط اللي بستلمه؟
لا تكتفي بـ«موقع متكامل» أو «تطبيق احترافي». اطلب قائمة مكتوبة فيها الصفحات والمزايا، والأهم: وش اللي مو داخل في السعر. اللغة الثانية، لوحة التحكم، ربط الدفع، كتابة المحتوى: كلها أشياء يفترض العميل إنها موجودة، وممكن تطلع لاحقًا بتكلفة إضافية.
2. كم السعر الكامل، ووش اللي ممكن يزيده؟
اسأل عن السعر النهائي، وكيف تنحسب التعديلات الخارجة عن الاتفاق. واسأل عن التكاليف المتكررة بعد الإطلاق: الدومين، الاستضافة، الاشتراكات، ورسوم المتاجر. المشروع الرخيص اليوم ممكن يكون غالي على مدار السنة.
3. كيف طريقة الدفع؟
الدفع على مراحل مرتبطة بتسليمات واضحة يحميك ويحمي المطور: دفعة عند البداية، ودفعة عند اعتماد التصميم، والباقي عند التسليم. وإذا انطلب منك المبلغ كامل مقدمًا، اسأل ليش.
4. مين يملك الكود والحسابات؟
هذا السؤال كثير ينتبهون له متأخر. تأكد إن الدومين والاستضافة وحسابات App Store و Google Play باسمك أنت، وإنك تستلم الكود والتوثيق كاملة عند التسليم. لو انتهى التعامل مع المطور يومًا، لازم تقدر تكمل مع غيره بدون ما تبدأ من الصفر.
5. وين شغلك السابق، ومين بيشتغل على مشروعي؟
اطلب روابط لمشاريع شغالة وجرّبها بنفسك من جوالك. واسأل مين اللي بينفذ فعليًا ومين اللي بتتواصل معه، وهل بتشوف التقدم أول بأول على رابط تجريبي، أو بتشوف النتيجة في النهاية بس.
6. وش يصير بعد الإطلاق؟
أي مشروع يحتاج تعديلات بعد ما يستخدمه ناس حقيقيين. اسأل: كم مدة الدعم المشمولة؟ كيف أبلّغ عن مشكلة، وخلال كم يتم الرد؟ وكم تكلفة الصيانة بعدها؟
7. وين بتنحفظ بيانات عملائي؟
إذا مشروعك يجمع أسماء أو أرقام جوالات أو طلبات، فنظام حماية البيانات الشخصية غالبًا ينطبق عليك. اسأل: وين الاستضافة؟ هل فيه نسخ احتياطي؟ ومين يقدر يوصل للبيانات؟
الخلاصة
المطور الجيد يرحب بهالأسئلة، وغالبًا يجاوبك قبل ما تسأل. وإذا كانت الإجابات غامضة، فهذي بحد ذاتها إجابة.
عندك مشروع وتبي رأي صريح فيه؟ تواصل معي وأجاوبك على السبعة كلها.